عسلامه يا طبربي ... بش نحكيلك حكايةباهية هاليلة ... خلينا نسميوها ... الانتخا-bête

المهم ضحكوا عليك المره أولى ... و وصلوا لتأسيسي و ماريت من وعودهم شي ... ماتخليهمش يعديوها عليك مره ثانيه ...

الأحزاب ألي ضحكت عليك ... ألي وعدتك بطريق في البحر ... ألي وعدتك ب 200 ميترو تراب في المريخ و الا زحل كي يربحو في انتخا-bête ... ألي وعدوك بش يدبرو خدمة لولدك الباطل ... ألي وعدوك بقرض تحل بيه جوانحك ... ماتخليهمش يعديوها عليك مره ثانيه ...

كسرولك راسك قبل 23 أكتوبر ... كل واحد يقولك أنا أولى بالخلافة ... بايعني ... زكيني ... أنتخبي ... كل واحد يقولك أنا البشير و أنا المنقد ... معايا لحلمه تولي حقيقة ...

حزبي بش يحل مشاكل المدينة لكل ... عنا مشاريع بالبالة ... برنامجنا الاقتصادي حضروه 256.66 خبير اقتصادي قاري في أكبر الجامعات الأوربية ... مشاريعنا التنموية بش تخدم شباب طبربة لكل ... بش تولي طبربة مدينة عالمية ... بش نهتمو بالثقافة .... بش نشجعو الشباب ... في كل حي بش نبنيو مكتبة فيها كتب للي يحب يقرا ... و صالة للفن التشكيلي ... و بش نعملو توأمه مع مدينة باريس و نتبادلو التجارب و الخبرات مع بعضنا ... معادش فقر ... معادش بطالة ... معادش تصحر فكري ... معادش فساد ... معادش معتمد سارق ... معادش عمدة بوهالي ... معادش رئيس بلدية بوجادي ... الجنه معانا تشوفوها ... انتخبونا و الله تربحونا ....

و توا تعدات 3 سنين ملي زاروك آحر مره .... و ماريت منهم شي ... الحمامة الزرڨة ماريت منها كالزڨ ... المنجل ماريت منو كان التبلعيط ... المريات عينيك بيها حوالت ... الحوتا كلاتك السردينا ألي كنت تقدر عليها و مخلاتلك شي ... لكلاهم عداوها عليك ... لكلهم كدبوا عليك ...

اليوم ... رجعوا ... نفس لوجوه ألي وعدوك ... بالجنه ... بالشغل و الحرية و الكرامة الوطنية ... ضحكوا عليك المره أولى ... و وصلوا لتأسيسي و ماريت من وعودهم شي ... ماتخليهمش يعديوها عليك مره ثانيه ... لعباد هادي ... غنيلها ملزومة عبد الرحمان الكافي ...

حكاية الانتخا-bête وفات لهنا ... بسلامة يا طبربي ...